Covid-19-ийн тухай дуу бүтээсэн нь үнэн

Ковид-19

Covid-19-ийн тухай дуу бүтээсэн нь үнэн

“Монгол улс Корона вирусын тухай дуутай болсон гэж сонслоо. Энэ үнэн үү? Өвчин зовлонгоор дуу хуур хийгээд болж байгаа юм уу? Үүнийг шалгуулмаар байна.” гэсэн иргэний хүсэлтийн дагуу дээрх мэдээллийг нягталж шалгалаа.

 

Ийм дуу зохиож дуулсан нь үнэн байна. Дууны клипийг Дорноговь аймгийн ЗДТГ-ын фейсбүүк хуудас өчигдөр буюу дөрөвдүгээр сарын 16-нд анх байршуулсан нь өнөөдрийн байдлаар 450 орчим шэйр аваад байна.   

Дууны клип “Дорноговь аймгийн Онцгой комисс үзүүлж байна” гэсэн бичвэрээр эхэлж, улмаар эхний 50 секунд Ерөнхий сайд, Шадар сайд, Эрүүл мэндийн сайд аймгийн Засаг дарга, УОК-ийн хурал, ЭМЯ-ны хэвлэлийн бага хурал зэрэг “албаны протокол” маягийн дүрсээр үргэлжилнэ.

 

Цаашид онцгой нөхцөл байдлын үеэр хэрэгжүүлж буй үйл явдлын бодит дүрсийг тусгажээ. Уг дууг Дорноговь аймгийн “Саран хөхөө” чуулгын дэргэдэх “Муза” хамтлаг дуулж дүрсжүүлсэн байна. Дууны аяыг тус чуулгын ая зохиогч А.Энхнаран хийсэн бөгөөд ямар нэг Солонгос дуунаас хуулбарлаагүй гэж хамтлагийн ахлагч Баяраа хэллээ. Учир нь уг хамтлагийн өмнө нь дуулсан “Цасан гоо” дууг олон нийт Солонгос дуунаас хуулбарласан хэмээн шүүмжилж байжээ. Дууг хамтлагийнхан өөрсдөө санаачлан бүтээсэн бөгөөд аймгийн Засаг даргаас санхүүгийн дэмжлэг хүссэн гэнэ. 

Өчигдөр Дорноговь аймгийн Онцгой Комиссын хуралдаанаар уг дууны санхүүжилтэд зориулж 6 сая төгрөг олгохоор шийдвэрлэжээ. Гэхдээ энэ мөнгийг Covid-19-ийн эсрэг олон нийтийг уриалсан богино хэмжээний шторконд мөн зарцуулна гэж хамтлагийн ахлагч бидэнд ярьсан юм. МонЦаМэ-гийн мэдээлснээр бол Дорноговь аймгийн Онцгой комиссын ажлыг дэмжиж байгууллага аж ахуй нэгжүүдээс нийт 597 орчим сая төгрөгийн хандив цугласнаас 499 орчим саяыг өчигдрийн байдлаар зарцуулаад байна.

Нэмж шинэчлэв. 2020 оны 4 дүгээр сарын 18
Хамтлагийн ахлагч бидэнд "Аймгийн Онцгой Комиссоос уг дууны санхүүжилтэд 6 сая төгрөг гаргахаар болсон" гэж хэлсэн ч өнөөдөр  Дорноговь аймгийн Онцгой комисс уг санхүүжилтийг гаргахгүй хэмээн албан ёсоор мэдэгдэв.  

Мэдээллийг нягталсан:

Г.Жавзмаа /Дефакто газет/

Б.Мягмарсүрэн / "Завханы мэдээ" сонин/

Ц.Чимэддондог /MCIR/

 

 

0
хуваалцах
Санал асуулга

НЯГТЛУУЛАХ, ХУУРАМЧ МЭДЭЭЛЭЛ ИЛГЭЭХ

Та хаа нэгтээ эргэлзээтэй мэдээлэлтэй таарсан уу? Ялангуяа олны танил, улс төрчдийн хэлсэн эргэлзээтэй мэдээлэл унгиж эсвэл сонссон уу? Бидэнд нягтлуулах мэдээллээ илгээгээрэй!

Мэдээлэл илгээхдээ тухайн мэдээллийг олж уншсан эх сурвалжийн линк (url) болон огноог бичнэ үү.

Бид таны имэйл хаягыг мэдээллийг нягтлан шалгах зорилгоор тантай холбоо барихаас бусад зорилгоор ашиглахгүй болно.